(297)                   ■■' SOUS LE RÈGNE DE CHARLES VI.                                    57
ou ordonnance de derreniere volenté ou nom de la tres sainte Trinité, le Pere, le Filz et le benoist saint Esperit, en la forme qui s'ensuit :
Et premierement il, comme bon et vray catholique, recommanda l'ame de lui, quant de son corps départira, à Nostre Sauveur Jhesu Crist, à la tres glorieuse Vierge Marie sa mere, à monseigneur saint Michiel l'ange età tous anges et archanges, à monseigneur saint Pierre et saint Pol, et à tous apostres, et à toute la benoite compaignie et court de Pa­radis, en leur suppliant qu'ilz vueillent son ame acompaigner eticelfe presenter à Nostre Seigneur Jhesu Crist, et lui supplier que d'icelle son ame il ait pitié et la vueille recevoir en sa compaignie, voulant tous ses torsfaiz estre amendez et ses debtes estre paiées par ses executeurs cy dessoubz nommez, et son corps àla sepulture de Saincte Eglise, lequel son corps il volt gésir en l'eglise de la Terne, qui est de l'ordre des Celestins ou diocese de Limoges, et estre dedans le cuer de la dicte eglise assez pres du grant autel au costé joingnant du mur.
Et volt et ordonna que sur son corps soit faicte et assise une tombe qui sera enlevée pié et demi plus hault de la terre, laquele tombe sera de pierre, en laquele sera sa representacion, armé de ses armes, et sera escript sur et autour de la dicte tombe son nom, son tiltre, le jour et an de son trespassement; et au dessus d'icelle tombe aura avec­ques ce une ymage de Nostre Dame qui sera painte dedans le mur, laquele ymage sera belle et bien faicte tenant Nostre Seigneur son en­fant entre ses bras, et aura devant la dicte ymage une representacion de sa personne faicte en paincture dedans le mur à l'endroit de sa tombe, où il sera à genoulx armé de ses armes, à mains joinctes, et sera pre­senté de deux ymages, l'une de saint Jehan Baptiste et l'autre de saint Guillaume. Et volt que par l'ordonnance de ses diz executeurs la dicte tombe, ymages et painctures dessus dictes soient faiz bien et honnorablement.
Et volt et ordonna que, de quelque lieu qu'il yra de vie à trespasse­ment, tout ce qui de son corps se pourra porter soit mené et conduit en la dicte eglise de la Ternes pour gésir soubz la dicte tombe, à laquele eglise il laissa et volt estre paié six cens livres Tournois pour une foiz»
8